दर्पण सह्याद्री न्यूज

प्रा.बाळासाहेब बोराडे
जालना: दरवर्षी लोककवी विठ्ठल वाघ राज्यस्तरीय काव्य पुरस्कार हा एका उत्कृष्ट काव्यसंग्रहाला दिला जातो.यावर्षी छत्रपती संभाजीनगर येथील प्रसिद्ध कवी ललित अधाने यांच्या ‘माही गोधडी छप्पन भोकी’ काव्यसंग्रहास 2023 चा
लोककवी विठ्ठल वाघ राज्यस्तरीय काव्य पुरस्कार नुकताच जाहीर झाला आहे.अकरा हजार रुपये रोख,सन्मानचिन्ह, सन्मानपत्र, शाल,श्रीफळ असे पुरस्काराचे स्वरूप असून 26 मे रोजी निफाड तालुक्यात कोकणगाव येथील मॅग्नस द्राक्ष एक्सपोर्ट कंपनीच्या आवारात सायंकाळी चार वाजता साहित्य रसिकांच्या उपस्थितीत हा पुरस्कार वितरण सोहळा संपन्न होणार असल्याचे पुरस्कार निवड समितीच्या वतीने सांगण्यात आले. अधाने यांना पुरस्कार जाहीर झाल्याबद्दल साहित्य क्षेत्रातील मान्यवर तसेच मित्र परिवारांकडून त्यांचे अभिनंदन होत आहे       

महाराष्ट्रातील ख्यातनाम कवी व स्वाभिमानी शेतकरी संघटनेचे प्रदेशाध्यक्ष संदीप जगताप तसेच इतिहासाचे गाढे अभ्यासक, प्रसिद्ध व्याख्याते प्रा.जावेद शेख यांच्या वतीने दरवर्षी एका उत्कृष्ट काव्यसंग्रहाला लोककवी विठ्ठल वाघ राज्यस्तरीय काव्यसंग्रह पुरस्कार दिला जातो.यावर्षी निवड समिती अध्यक्ष कवी लक्ष्मण महाडिक यांनी ललित अधाने यांच्या ‘माही गोधडी छप्पन भोकी’ या काव्यसंग्रहास पुरस्कार जाहीर झाल्याची घोषणा केली.त्यास इतर निवड समितीच्या सदस्यांनीही सहमती दर्शवली.निवड समितीत जयश्री वाघ, ज्ञानेश उगले, सागर जाधव आदी मान्यवर साहित्यिकांनी सदस्य म्हणून काम बघितले.कवी ललित अधाने हे शेतकरी ,कष्टकरी, गावखेड्याचे समकालीन वास्तव मांडताना दिसून येतात.केवळ रडण्याची कविता न लिहिता ते लढण्याची कविता लिहितात.अधाने यांच्या ‘माही गोधडी छप्पन भोकी’ या कवितासंग्रहात अन्यायाविरुद्धची विद्रोही भूमिका दिसून येते. भूमी आणि भूमिका घेऊन ललित अधाने हे कविता लिहितात . दलित साहित्याप्रमाणे टोकाचा विद्रोह ग्रामीण कवितेत अभावाने दिसतो.तो ललित अधानेच्या कवितेत सापडला आहे. ही कविता जळजळीत वास्तव मांडते.या व्यवस्थेच्या डोळ्यात झणझणीत अंजन घालते म्हणून ही कविता वेगळी ठरते. म्हणून आम्ही सर्वानुमते ‘माही गोधडी छप्पन भोकी’ या
काव्यसंग्रहाची पुरस्कारासाठी निवड केली असे प्रतिपादन निवड समितीचे अध्यक्ष लक्ष्मण महाडिक यांनी पुरस्कार जाहीर करताना केले.साहित्य क्षेत्रात अतिशय सन्मानाचा समजला जाणारा लोककवी विठ्ठल वाघ साहित्य पुरस्कार जाहीर झाल्याबद्दल कवी ललित अधाने यांचे सर्व स्तरातून अभिनंदन होत आहे.